Парлумон санади муҳимро то тобистон ба тасвиб хоҳад расонд

Душанбе, 11 декабр.(АМИТ «Ховар», Марзия Саидова).-Парлумони Тоҷикистон то 7 июни сол 2013 санади узвияти Ҷумҳурии Тоҷикистонро ба Созмони Ҷаҳонии Тиҷорат /СҶТ/ бояд ба тасвиб расонад ва баъди аз 30 рўзи огоҳ кардани СҶТ аз тасвиби узвият ба ин созмон Ҷумҳурии Тоҷикистон узви комилҳуқуқи СҶТ мегардад ва кишвари мо муваззаф мешавад, ки тамоми созишномаҳои СҶТ-ро дар қаламрави кишвар татбиқ намояд. Бояд тазаккур дод, ки шоми 10 декабр баъди он, ки тамоми аъзои СҶТ бастаи санадҳои воридшавии Тоҷикистонро ба СҶТ қабул карданд, Шўрои умумии СҶТ дар нишасти худ узвияти Тоҷикистонро ба ин созмон тасдиқ намуд. Саидмўъмин Камолов – Роҳбари миллии барномаи «Пешбурди тиҷорат дар Тоҷикистон»-и Маркази байналмилалии тиҷорат (МБТ) мегўяд, ки ин қадами ниҳоии раванди узвияти Тоҷикистон ба СҶТ буд, ки баъди гуфтушунидҳои дуҷонибаву чандҷонибаи даҳсола анҷом пазируфт.