«Созандагони Ватан» дар Маскав

Душанбе, 14 декабр. (АМИТ «Ховар», Дилшодаи Хайруллоҳ).- Имрӯз дар толори Маркази иттилоотии мултимедии байналмилалии РИА «НОВОСТИ» дар шаҳри Маскави Федератсияи Русия конфронси байналамилалӣ дар мавзӯи «Мусоидати иттилоотӣ дар ҳамгироии АвруОсиё: ҳадаф, вазифа ва роҳҳои амалисозии он» баргузор гардид, ки дар кори он намояндагони ҷавони 17 кишвари минтақа ширкат варзиданд. Ҷумҳурии Тоҷикистонро Ташкилоти ҷамъиятии ҷавонон «Созандагони Ватан» дар ҳайати ду нафар: Адҳам Мирсаидов ва Насимҷон Маликисломов муаррифӣ намуданд. Сарпарастони конфронси мазкур «Фонди рушди ҳамкориҳои АвруОсиё» ва Агентии иттилоотии Русия «РИА НОВОСТИ» буда, чорабинӣ дар асоси барномаи амали «Лигаи иттилоотии АвруОсиё» баргузор гардид. «Лигаи иттилоотии АвруОсиё» моҳи августи соли равон дар шаҳри Тсахкадзори Ҷумҳурии Арманистон созмон ёфта буд ва ташкилоти «Созандагони Ватан» ҳамчун яке аз муассисони ниҳоди мазкур ба шумор меравад. Дар кори конфронс маводи омоданамудаи «Лигаи иттилоотии АвруОсиё» муаррифӣ гардид, ки дар баррасии он намояндагони Ташкилоти ҷамъиятии ҷавонон «Созандагони Ватан» фаъолона ширкат варзиданд. Дар ҷамъбасти конфронс бо назардошти хулосаву андешаи иштирокдорон дар бобати густариши ҳамкории иттилоотии минбаъда таъсиси шабакаи интернетии алоҳида зарур дониста ва нақшаи баргузории чорабиниҳои ояндаи «Лигаи иттилоотии АвруОсиё» муайян карда шуд.