Суханронии Сафири Тоҷикистон дар Донишгоҳи озоди Берлин

Душанбе, 6 декабр. (АМИТ «Ховар»). – Чанде пеш Сафири Тоҷикистон дар Ҷумҳурии Федеративии Олмон Имомуддин Сатторов дар ҳузури профессорону омӯзгорон ва донишҷӯёни Донишгоҳи озоди Берлин бахшида ба сиёсати дохилию хориҷии Ҷумҳурии Тоҷикистон суханронӣ кард.Имомуддин Сатторов зимни суханрониаш аз рушди сиёсӣ ва иҷтимоию иқтисодии Тоҷикистон дар марҳилаи ҳозира ва перомуни ислоҳоту барномаҳое нақл кард, ки мақсад аз онҳо баланд бардоштани мақоми ниҳодҳои демократӣ, ҷомеаи шаҳрвандӣ, такмили бахши иҷтимоӣ ва таъмини рушду густариши босуръати иқтисодии кишвар аст. Мавсуф дар мавриди самтҳои асосии сиёсати хориҷии Тоҷикистон қайд намуд, ки Ҳукумати кишвар дар ҳошияи татбиқи сиёсати хориҷӣ консепсияи «дарҳои кушода» ва мавқеи қавиро дар амри масоили мубрами ҷаҳонию минтақавӣ пеш мегирад.Донишгоҳи озоди Берлин яке аз марказҳои муҳимтарини маорифу илми Олмон маҳсуб ёфта, яке аз марказҳои интернатсионалии Аврупо ба шумор меравад.