Тақвияти назорати давлатии сифат

Душанбе, 21 декабр. (АМИТ «Ховар», Бекназари Абӯбакр). — Имрӯз дар шаҳри Душанбе ҷаласаи Шӯрои ҳамоҳангсозӣ оид ба сифат, бехатарии маҳсулот, кор ва хизматрасонии назди Агентии «Тоҷикстандарт» баргузор гардид. Аз Агентии «Тоҷикстандарт» ба АМИТ «Ховар» иттилоъ доданд, ки дар ҷаласаи мазкур масъалаҳои татбиқи Қарори Ҳукумати Ҷумҳурии Тоҷикистон «Дар бораи барномаи давлатии сифат барои солҳои 2013-2015», ҷорӣ намудани низоми нави менеҷменти сифат дар корхонаҳои ватанӣ, пурзӯр намудани назорати давлатӣ дар корхонаҳои истеҳсолӣ ва амсоли инҳо муҳокима ва баррасӣ шуданд, ки ҳамаи ин ба раванди татбиқи барномаҳои Тоҷикистон дар доираи Созмони ҷаҳонии тиҷорат мусоидат мекунад. Ёдовар мешавем, ки Шӯрои ҳамоҳангсозӣ оид ба сифат, бехатарии маҳсулот, кор ва хизматрасонии назди Агентии «Тоҷикстандарт» чанд сол аст, ки аз ҳисоби намояндагони вазорату идораҳои дахлдор фаъолият мекунад.