Таҷлили 70-солагии Ҷӯрабек Муродов дар Суғд

Душанбе, 18 декабр. (АМИТ «Ховар», Бекназари Абӯбакр). — Дар шаҳри Хуҷанд ҷамъомади тантанавӣ ба муносибати 70- солагии Ҳунарманди халқии Ҷумҳурии Тоҷикистон Ҷӯрабек Муродов доир гардид. Раиси вилояти Суғд Қоҳир Расулзода соҳибҷашн, Ҳунарманди мардумии Иттиҳоди Шӯравӣ Ҷӯрабек Муродовро бо ҷашни милод ва панҷоҳсолагии фаъолияти эҷодиаш аз номи мақомоти иҷроияи ҳокимияти давлатии вилоят табрику таҳният гуфта, саҳми Ҷӯрабек Муродовро дар тарғиби санъати тоҷик назаррас арзёбӣ намуд. Ӯ Ҷ. Муродовро ҳофизи миллии халқи тоҷик номида, гуфт, ки бо шарофати сиёсати хирадмандонаи Сарвари давлат Эмомалӣ Раҳмон дар баробари ҷабҳаҳои дигар фарҳанги тоҷик рӯ ба рушд овардааст ва дар қатори нобиғаҳои санъат — Ҳоҷиабдулазиз, Акашариф Ҷӯраев, Зафар Нозимов, Боймуҳаммад Ниёзов ва дигарон Ҷӯрабек Муродов низ ифтихори миллати тоҷик мебошад.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки барои хизматҳои шоёнаш дар рушду нумӯи санъату фарҳанги тоҷик раиси вилоят ба Ҷӯрабек Муродов ҳуҷҷатҳои ҳуҷраи истиқоматиро аз маркази вилоят инъом кард.