Таълимоти Конфутсий интиҳо надорад

Душанбе, 13 декабр. (АМИТ «Ховар», Людмила Дубинина ). – «Таълимоти Конфутсий беинтиҳост» — чунин буд мавзӯи мизи мудаввар, ки чанде пеш дар Маркази илму фарҳанги Русия воқеъ дар шаҳри Душанбе баргузор гардид. Ин чорабинӣ бо ибтикори намояндагии ҳамкории Русия дар Тоҷикистон, маркази Конфутсий дар Донишгоҳи миллии Тоҷикистон ва Ҷамъияти дӯстии «Тоҷикистону Чин» роҳандозӣ шуд. Раиси Ҷамъияти дӯстии «Тоҷикистону Чин», ректори Донишкадаи давлатии забони Тоҷикистон ба номи Сотим Улуғзода профессор Хуршед Зиёев ва донишҷӯи донишкадаи мазкур Юлия Шайхризоева дар мавзӯъҳои «Ҳаёту эҷодиёти файласуфи бузург Конфутсий», «Анъанаҳои таълимоти Конфутсий», «Конфутсий ва адабиёти рус» гузориш доданд.Дар хотима роҳбари Маркази Конфутсий аз ҷониби Чин Ден Син ва аз ҷониби Тоҷикистон Рустам Шодиев иштирокдорони мизи мудавварро бо фаъолияти Маркази Конфутсий, ки аз соли 2009 инҷониб дар Донишгоҳи миллии Тоҷикистон фаъолият дорад, шинос намуданд.