Вохӯрии кормандони милиса бо донишҷӯён

Душанбе, 5 декабр. (АМИТ «Ховар», Лутфия Эшонкулова).-Роҳбарияти Вазорати корҳои дохилии кишвар тасмим гирифтааст, ки вохӯрию корҳои фаҳмондадиҳиро дар самти пешгирии амалҳои номатлуб, аз ҷумла ҷинояткорӣ дар ҷомеа бо аҳолӣ, бахусус дар байни донишҷӯён ба роҳ монад. Ба мақсади пешгирии кирдорҳои ҷиноӣ, мусоидат кардан ба маърифати ҳуқуқии шаҳрвандон дар толори Донишгоҳи аграрии Тоҷикистон ба номи Шириншоҳ Шоҳтемур вохӯрии муовини сардори Раёсати ҳифзи тартиботи ҷамъиятии ВКД полковники милитсия Ҳотамшо Ятимов бо устодону донишҷӯёни донишкада доир гардид. Тавре ки сомонаи расмии ВКД хабар медиҳад, дар вохӯрӣ зикр гардид, ки танҳо дар якҷоягӣ ва ҳамбастагӣ мо метавонем ҳама гуна падидаҳои номатлуби ҷиноятиро аз ҷомеаамон бартараф созем. Аз ин хотир муовини сардори раёсати мазкур донишҷӯёнро ба ҳамкорӣ бо мақомоти милитсия даъват карда афзуд, ки беҳтарин омили пешгирии ҷиноятпешагӣ дар ҷомеа ин аз ҳисоби донишҷӯёни фаъоли донишгоҳу донишкадаҳо зиёд кардани шумораи дӯстони милитсия -дружиначиёни ихтиёрӣ мебошад.