1,1 млрд. сомонӣ барои рушди соҳибкорӣ дар Суғд

Душанбе, 31 январ. (АМИТ «Ховар», Бекназари Абӯбакр). — Дар самти беҳтар намудани имкониятҳои дастрасии қарзҳои хурд ба соҳибкорону тоҷирон, такмил додан ва содда гардонидани низоми воридоту содироти молу маҳсулот, ҷорӣ кардани усули “Равзанаи ягона” ва амсоли инҳо дар вилояти Суғд як силсила корҳои судбахш анҷом дода шуданд. Ин нукта зимни мулоқоти раиси вилоят бо соҳибкорон 29 январ зикр гардид. Мавриди зикр аст, ки танҳо дар соли 2012 ба соҳибкорон аз ҷониби ташкилотҳои қарзии вилоят ба андозаи 1,1 млрд. сомонӣ захираҳои қарзӣ пешниҳод шуд, ки он 70 фоизи қарзи умумиро ташкил дода, ин раванд ба беҳтар шудани дастрасии захираҳои молиявӣ ба соҳибкорон ва вусъати фаъолияти онҳо боис гардид. Ҳамзамон маблағгузорӣ барои рушди соҳибкории истеҳсолӣ пайваста ташаккул ёфта, соли равон ба ин соҳа зиёда аз 800 млн.сомонӣ қарзҳо пешниҳод гардиданд.