1,5 миллион сомонӣ- кӯмак ба зарардидагон

Душанбе, 18 январ. (АМИТ «Ховар», Мавзуна Бойева).- «Аз хисоби фонди Президенти Ҷумҳурии Тоҷикистон ва аз тарафи Ҳукумати ҶТ барои зарардидагони оқибатҳои ҳолатҳои фавқулодда кӯмаки яквақтаинаи пулӣ ба маблағи 1 миллиону 358 ҳазору 700 сомонӣ ҷудо гардидааст», — гуфт ба хабарнигорони ВАО имрӯз раиси Кумитаи ҳолатҳои фавқулодда ва мудофиаи граждании назди Ҳукумати ҶТ Хайриддин Абдураҳимов.  Ӯ ҳамчунин зикр кард, ки ташкилоту созмонҳои башардӯстонаи байналмилалӣ ҷиҳати расонидани кӯмакҳо ба зарардидагон саҳми худро гузоштанд. Аз ҷумла, ҷамъияти Ҳилоли Аҳмари Тоҷикистон, ташкилотҳои ғайридавлатии Кореяи Ҷанубӣ «Международное добрососедство» ва «Глобал Партнерст».«Маблағи умумии кӯмакҳои аз ҷониби ташкилотҳои байналмилалӣ ба зарардидагон расида ҷамъ 252 ҳазору 713 доллари ИМА-ро ташкил медиҳад», зикр кард Хайриддин Абдураҳимов.