Ғалабаи дастаҳои футболи хурди БМТ

Душанбе, 16 январ. (АМИТ «Ховар», Покиза Маҳмадбекова). — Дар соли 2012 бори нахуст аз тарафи Иттиҳоди футзали Ҷумҳурии Тоҷикистон чемпионат оид ба футзал дар ду сатҳ – силсилаи “А” ва силсилаи “Б” ташкил карда шуд. Дастаи Бонки миллии Тоҷикистон аввал дар силсилаи “Б”, яъне лигаи якуми чемпионат ширкат варзида, ҷойи якумро ишғол намуд ва барои иштирок дар силсилаи “А” (лигаи олӣ) роҳхат гирифт.  Тавре ки ба мухбири АМИТ «Ховар» аз хадамоти матбуоти Бонки миллӣ иттилоъ доданд, дар айни замон дастаи мо дар лигаи олии футзал фаъолона бозӣ карда, дар ҷадвали дастаҳо яке аз аввалинҳо мебошад. Хотирмонтарин комёбии дастаи футболи хурди Бонки миллии Тоҷикистон дар соли 2012- ин иштирок дар мусобиқа барои дарёфти “Ҷоми Александр Кирсанов” ва ғалаба дар он буд. Ташаббускорону ташкилкунандагони мусобиқаи пуршукуҳ дастаи Бонки миллии Тоҷикистонро табрик намуда, ботантана Ҷоми гиромидошти хотираи Александр Кирсановро ба мураббии даста Мирзонаҷот Назаров супориданд. Ҳамин тариқ, шумораи ҷомҳои дастаи футболи хурди Бонки миллии Тоҷикистон боз афзун гашта, дар китоби музаффариятҳои он саҳифаи наве илова шуд.