Ҷаласаи гуруҳи кории байналмилалии АНМН

Душанбе, 18 январ. (АМИТ «Ховар», Ибодат Давлатова).-Дирӯз дар доираи татбиқи Лоиҳаи Раёсати СММ оид ба маводи мухаддир ва ҷинояткорӣ дар Агентии назорати маводи нашъаовари Ҷумҳурии Тоҷикистон ҷаласаи навбатии нақшавии гуруҳи кории байналмилалӣ баргузор гардид. Тавре ки ба мухбири АМИТ «Ховар» аз Агентии мазкур иттилоъ доданд, дар кори ҷаласа директори Агентӣ, ҳамоҳангсозони барномавӣ- лоиҳавии Намояндагии Раёсати СММ оид ба маводи мухаддир ва ҷинояткорӣ дар Тоҷикистон ва Осиёи Марказӣ, кормандони масъули Сафорати ИМА дар Тоҷикистон, ҳамчунин роҳбарони хадамоти муҳими АНМН иштирок намуданд. Дар ҷаласа ҷараёни иҷрои чорабиниҳои алоқаманд ба маблағгузории воҳидҳои Агентӣ мавриди баррасӣ қарор гирифт. Бо мақсади рушди самараноки фаъолияти Агентӣ қарор карда шуд, ки ба расонидани воситаҳои техникии махсус ва техникаи ташкилӣ идома дода шавад, ба таҳкими иқтидори лабораторияҳои ташхиси судӣ ва шуъбаи кинологӣ, харидани сагҳои асил барои омӯзиш додан ва зиёд кардани насли онҳо, ҳамчунин расонидани кӯмак барои такмили ихтисоси кормандони Агентӣ идома дода шавад. Ёдовар мешавем, ки яке аз вазифаҳои гуруҳи кории байналмилалӣ истифодаи мақсаднок ва пурсамари воситаҳои пулие мебошад, ки барои рушди Агентии назорати маводи нашъаовар Раёсати СММ оид ба маводи мухаддир ва ҷинояткорӣ ва маблағгузорони лоиҳа ҷудо кардаанд.