Афзоиши муҳоҷирони меҳнатӣ

Душанбе, 24 январ. (АМИТ «Ховар» Суғдмеҳри Маъруфзод).-Муҳоҷирати меҳнатӣ равандест, ки аксари кишварҳои олам бо ин падида рӯ ба рӯ мебошанд ва тибқи маълумоти Созмони байналмилалии муҳоҷират дар соли 2010 теъдоди муҳоҷирони меҳнатӣ 214 миллион нафарро ташкил дода, бо пешбиниҳое, ки коршиносон ва мутахассисони соҳаи муҳоҷират анҷом додаанд, то соли 2050 теъдоди муҳоҷирон дар олам ба 405 миллион нафар мерасад. Тибқи иттилои Абдулло Қодирӣ, сухангӯи дафтари матбуоти Хадамоти муҳоҷират, шумораи муҳоҷирони тоҷик дар айни замон 744 ҳазору 360 нафарро ташкил медиҳад. Наздик ба 90%-и муҳоҷирони меҳнатии мо ба ФР сафар менамоянд. Надонистани забони русӣ ва надоштани касбу ҳунари ҷавобгӯ ба талаботи бозори меҳнат яке аз мушкилоти асосии муҳоҷирони меҳнатии мо мебошад, ки дар ҳама ҳолат монеи фаъолияташон мегардад.