Баррасии ҳамкориҳои Тоҷикистону Афғонистон
Душанбе, 28 январ. (АМИТ «Ховар», Кристина Эрлих). – «Масоили умумии обию зистмуҳитии Афғонистон ва Тоҷикистон»-чунин ном дошт семинаре, ки 28 январ дар шаҳри Душанбе доир шуд. Чорабинӣ бо ибтикори Вазорати мелиоратсия ва захираҳои оби ҷумҳурӣ дар ҳамдастӣ бо Созмони амният ва ҳамкории Аврупо (САҲА) ташкил шуд. Дар кори семинар муовини аввали вазири мелиоратсия ва захираҳои оби ҷумҳурӣ Султон Раҳимов, муовини директори масоили иқтисодии Вазорати корҳои хориҷии Ҷумҳурии Исломии Афғонистон Азизуллоҳ Умар, муовини роҳбари Бюрои САҲА дар Тоҷикистон Ҳанс-Питер Ларсен, ҳамчунин шахсони масъул ва мутахассисони пешбари вазорату идораҳои ҷумҳурӣ, ташкилотҳои хориҷӣ ва коршиносон иштирок намуданд. Султон Раҳимов, муовини аввали вазири мелиоратсия ва захираҳои оби ҷумҳурӣ дар семинар гуфт: «Соли 2013 дар Тоҷикистон соли ҳамкории байналмилалӣ дар соҳаи об эълон шудааст ва он барои таҳким ва рушди ҳамкориҳои фаромарзии обӣ бо давлатҳои наздисоҳилӣ ба мо имконияти хуб медиҳад. Дар ин замина барои Ҳукумати ҶТ барқарорсозӣ ва таҳкими ҳамкориҳои обӣ бо ҳамсояи наздик, дӯст ва бародари мо-Афғонистон хеле муҳим аст. Ба сифати асоси рушди ин гуна ҳамкорӣ, пеш аз ҳама таърих, дин, анъана, забон ва муносибатҳои куҳану дӯстонаи мо хизмат мекунанд. Тоҷикистон ва Афғонистон дар масъалаи об бо ҳам зич алоқаманданд ва ду кишвари болооб ба шумор рафта, қариб 90%-и оби Амударё аз ин кишварҳо сарчашма мегирад. Ҳамасола ин кишварҳо бо мушкилот рӯ ба рӯ мегарданд, ки миёни онҳо обхезиҳои зиёде, ки ба иқтисодиёт ва экологияи кишвар хисороти бениҳоят азим ворид месозанд, мавқеи махсус доранд. Мушкилоти обшавии пиряхҳо, лағзиши онҳо, бодлесии замин, камшавии ҷангалзор-ин номгӯи ками масъалаҳо ва мушкилотест, ки мо бояд онҳоро дар якҷоягӣ ҳал намоем. Конфронси имрӯза ба коршиносони мо имкон медиҳад, ки барои ҳалли мушкилоти обию зистмуҳитии минтақа тавсияҳои заруриро таҳия намоянд. Дар ин кор ба мо ташкилотҳои хориҷӣ, аз ҷумла САҲА кӯмак мерасонад. Ҳукумати ҶТ ҳамчун кишвари ташаббускор 20-21 август дар шаҳри Душанбе Конфронси байналмилалии сатҳи баландро оид ба ҳамкориҳо дар соҳаи об мегузаронад, ки ба он шарикони афғонӣ низ барои баррасӣ ва ҳалли масоили обию зистмуҳитӣ даъват шудаанд». Доир ба натиҷаҳои семинар тавсияҳои муштарак оид ба ҳалли самараноки мушкилот дар идораи захираҳои обии ҳарду минтақа таҳия мешаванд.








Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд






