Беҳрӯз ҷоизаи Исмоили Сомонӣ гирифт

Душанбе, 4 январ. (АМИТ «Ховар», Раъно Нусратуллоева).- Ҳамасола хатмкунандагони Донишкадаи давлатии санъати Тоҷикистон ба номи Мирзо Турсунзода чандин намоишномаҳои дипломиро пешниҳод менамоянд. Тавре ки ноиби ректори Донишкадаи давлатии санъати Тоҷикистон ба номи Мирзо Турсунзода Тағоймурод Назаров ба мухбири АМИТ «Ховар» хабар дод, омӯзгори ҷавони кафедраи санъати тасвирии факултаи театри бадеии ДДСТ Беҳрӯз Забиров соҳиби ҷоизаи ба номи Исмоили Сомонии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ва Диплому мукофоти нақдии кумита гардид. Ҳамчунин ҳунармандони студияи «Аҳорун»-и Театри таҷрибавии тамошобини ҷавон ба номи Муҳаммадҷон Қосимов, яъне хатмкунандагони шуъбаи актёрии Донишкадаи давлатии санъати Тоҷикистон ба номи Мирзо Турсунзода бо ҷоиза ва мукофотпулии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон сазовор гардиданд. Ёдовар мешавем, ки ҳунармандони студияи «Аҳорун»-и Театри таҷрибавии тамошобини ҷавон ба номи Муҳаммадҷон Қосимов, яъне собиқ хатмкунандагони шуъбаи актёрии Донишкадаи давлатии санъати Тоҷикистон ба номи Мирзо Турсунзода намоишномаи «Юсуфи гумгашта боз ояд ба Канъон »-ро дар Театри академии драмаи русии ба номи В. Маяковский намоиш дода буданд.