Боғи ҳайвонотро ба куҷо мекӯчонанд?

Душанбе, 22 январ.(АМИТ «Ховар», Марзия Саидова).- Боғи ҳайвоноти шаҳри Душанбе дар оянда ба дигар мавзеи пойтахт кӯчонида мешавад. Интизор меравад, ки шаҳрдории Душанбе дар робита ба кӯчонидани Боғи ҳайвоноти пойтахт ҷиҳати дарёфти андешаву пешниҳодҳои муфид байни сокинон ва пажуҳишгоҳҳои лоиҳакашӣ озмуни кушод эълон менамояд. Мавриди зикр аст, ки масъалаи кӯчонидани Боғи ҳайвоноти пойтахт дар маҷлиси васеи Ҳукумати Ҷумҳурии Тоҷикистон доир ба ҷамъбасти натиҷаҳои рушди иқтисодиву иҷтимоии мамлакат дар соли 2012-ум ва вазифаҳо барои соли 2013, ки 15 январ дар Душанбе баргузор гардид, матраҳ шуда буд. Боғи ҳайвоноти шаҳри Душанбе соли 1961 дар масоҳати 1,5 гектар ташкил шуда, алҳол ҳудуди он 6, 17 гектарро ташкил медиҳад. Дар Боғи ҳайвоноти пойтахт 115 намуди ҳайвонот, паррандаю хазандаҳо нигоҳ дошта мешаванд, ки аксарияташон ба «Китоби Сурх» ворид шудаанд.