Боздошти сокини Душанбе бо мухаддирот ва туфангча

Душанбе, 8 январ. (АМИТ «Ховар», Ибодат Давлатова).- Кормандони Агентии назорати маводи нашъаовари назди Президенти Ҷумҳурии Тоҷикистон амалиёти муваффақонаи мусодираи маводи мухаддирро аз муомилоти ғайриқонунӣ ба анҷом расониданд. Тавре ки ба мухбири АМИТ «Ховар» аз Агентии мазкур иттилоъ доданд, як сокини 34-солаи пойтахт, ки гумон мерафт ба тиҷорат ва интиқоли мухаддирот сарукор дорад, муддати дароз мавриди пайгирӣ қарор дошт.Рӯзи ниҳоии амалиёт дар ҷараёни кофтукови маҳалли истиқомати ӯ кормандони фаврӣ 22 бастаи дорои маводи хамирмонанди дорои бӯи махсусро ошкор ва мусодира намуданд. Тибқи хулосаи шуъбаи ташхиси судии Агентӣ маводи мусодирашуда воситаи нашъаовари афюн буда, вазни он ҳудудан 10 килоро ташкил медод. Дар ҷараёни роҳандозии чорабинии дигари фаврию ҷустуҷӯӣ дар хонаи боздоштшуда силоҳи оташфишон — туфангчаи тамғаи “Макаров” бо тирҳояш кашф ва мусодира шуд.