Бунёди хонаҳои истиқоматӣ вусъат меёбад

Душанбе, 16 январ. (АМИТ «Ховар», Мавзуна Бойева). — Дар тӯли соли 2012 мактабҳои таҳсилоти умумӣ барои 17908 ҷой, дармонгоҳ барои 672 қабул дар як баст, беморхонаи дорои 195 кат ба истифода дода шуданд, -гуфт имрӯз зимни нишасти матбуотӣ ба хабарнигорони дохилӣ ва хориҷӣ директори Агентии сохтмон ва меъмории назди Ҳукумати ҶТ Абдувалӣ Комилов. Ӯ ҳамчунин зикр кард, ки дар ин муддат дар масоҳати умумии 873 ҳазору 216 метри мураббаъ хонаҳои истиқоматӣ ба истифода дода шуданд. Дар ин давра ҳамчунин аз фондҳои асосӣ ба маблағи 2 миллиарду 319 миллиону 21 ҳазор сомонӣ маблағ фаъол гардонида шуда, иҷрои корҳои сохтмонию васлгарӣ 3 миллиарду 716 миллиону 169 ҳазор сомониро ташкил медиҳад.