Чаро ҳаҷми боркашонии роҳи оҳан коҳиш ёфтааст?

Душанбе, 22 январ. (АМИТ «Ховар», Ибодат Давлатова).-Дар соли 2012 ҳаҷми боркашонӣ дар КВД «Роҳи оҳани Тоҷикистон» 8 млн. 410 ҳазор тоннаро ташкил дод, иттилоъ доданд дар нишасти матбуотии «Роҳи оҳани Тоҷикистон».Зикр гардид, ки ин нишондод нисбат ба ҳамин давраи соли 2011 847 ҳазор тонна ва нисбат ба соли 2009 6 млн. 136 ҳазор тонна кам мебошад. Агар солҳои пеш дар ҳаҷми умумии боркашонӣ саҳми боркашонии транзитӣ зиёд буд, аллакай дар соли гузашта миқдори боркашонии воридотию содиротӣ бештар гаштааст, ки сабаби кам шудани ҳаҷми боркашонии транзитӣ баста будани роҳи оҳани Ӯзбекистон мебошад. Боркашонии транзитӣ дар соли сипаришуда 2 млн. 961 ҳазор тоннаро ташкил дод, ки назар ба ҳамин давраи соли 2011 941 ҳазор тонна ва соли 2009 6 млн. 67 ҳазор тонна ва ё 67,2% кам шудааст.