Чаро содироти пахтаю алюминий кам шуд?

Душанбе, 30 январ.(АМИТ «Ховар», Марзия Саидова).-Дар сохтори содиротии кишвар вазъи қиёсии ду навъи маҳсулоти асосӣ — пахта ва алюминий, ки 70% -и ҳиссаи содироти давлатро ташкил медиҳанд, кам шудааст, мегӯяд Шариф Раҳимзода –вазири рушди иқтисод ва савдои ҷумҳурӣ. Дар соли 2012 ҳиссаи пахта ва алюминий то 56% кам гардид. Он ҳам бошад аз ҳисоби зиёд шудани содироти молҳои нассоҷӣ. Аз ҷумла, содироти ришта аз Тоҷикистон ба хориҷи кишвар 2, 1 маротиба афзоиш ёфта, содироти матои пахтагин 78,8 % зиёд шудааст. Шариф Раҳимзода афзуд, ки дар соли 2012 Тоҷикистон ба кишварҳои хориҷӣ 2 баробар зиёд пахта содир намудааст. Аммо бо сабаби поён рафтани нархи пахта дар бозори ҷаҳонӣ, асъори хориҷие, ки аз ҳисоби содироти зиёди пахта гирифта шудааст, аз он асъори хориҷие, ки соли гузашта ба даст омадааст, фарқи зиёд надорад, зеро нархи пахта ба ҳисоби миёна аз 2772 $ барои ҳар як тонна дар соли 2011 дар соли 2012 то 1559 $ коҳиш ёфт.