Дар Суғд 120 корхона бунёд мешавад

Душанбе, 17 январ. (АМИТ «Ховар», Бекназари Абӯбакр). — Раиси вилояти Суғд Қоҳир Расулзода зимни гузориши худ дар маҷлиси васеи Ҳукумати мамлакат 15 январ зикр намуд, ки соли 2013 тибқи нақшаҳои пешакӣ дар қаламрави вилоят 120 корхонаи хурди истеҳсолӣ бо 4455 ҷойи корӣ мавриди истифода қарор мегирад.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки дар давоми соли 2012 дар қаламрави вилоят 102 коргоҳи хурду миёна мавриди истифода қарор гирифта, беш аз 3 900 ҷойи корӣ ташкил гардид.Ёдовар мешавем, ки соли 2012 корхонаҳои саноатии вилояти Суғд ба маблағи 3666848,1 ҳазор сомонӣ маҳсулот истеҳсол карданд. Дар соли 2012 аз 288 корхонаи саноатӣ 218 ё 75,7 фоизаш дар истеҳсоли маҳсулот ба сатҳи соли 2011 расиданд, аммо 69 корхона аз дараҷаи соли 2011 кам маҳсулот баровардааст.