Дарёфт ва мусодираи зиёда аз 27 кило маводи нашъаовар

Душанбе, 3 январ.(АМИТ « Ховар »,Фарзона Достонзода ).-22 килою 738 грамм маводи нашъадори навъи ҳашиш аз ҷониби кормандони РВКД дар вилояти Суғд ҳангоми гузаронидани чораҳои фаврию ҷустуҷӯӣ дарёфт ва мусодира шуд.  Тавре ки сомонаи расмии Вазорати корҳои дохилии ҶТ иттилоъ дод, хангоми кофтуков сокини шаҳри Норак, корманди СКС КДАМ ҶТ дар ноҳияи Исфара И. Некқадамови 30- сола ҳамчун гумонбар дар ғайриқонунӣ нигоҳ доштани маводи нашъадор дастгир шуда, аз ӯ ба миқдори 22 килою 738 грамм маводи нашъадори навъи ҳашиш дарёфт ва мусодира карда шуд. Ҳамчунин аз ҷониби кормандони мақомоти корҳои дохилӣ дар ноҳияи Конибодом шаҳрванд Раҳим Қурбонов, соли таваллудаш 1962, сокини кӯчаи Аттории шаҳри Конибодом, ки пештар бо моддаи 347 КҶ ҶТ суд шудааст, ҳамчун гумонбар дар ғайриқонунӣ нигоҳ доштани маводи нашъадор дастгир шуд. Ҳангоми тафтиши мошини шахсии Р. Қурбонов (тамғаи «Ауди», рақами давлатиаш 24-44 РТ 02), аз дохили бордони мошин 5 адад бастаи селофанӣ ва 1 адад халтаи селофанӣ, ки дар дохилашон 3 килою 701 грамм маводи нашъадори навъи ҳашиш ва 858 грамм бангдона буд, дарёфт ва мусодира гардид. Аз рӯи ин ҳодисаҳо парвандаи ҷиноӣ оғоз гардида, тафтиш идома дорад.