Дидбонгоҳҳои КҲФ фаъоланд

Душанбе, 18 январ. (АМИТ «Ховар», Мавзуна Бойева).-  «Тибқи «Нақшаи дурнамои кӯчонидани хоҷагиҳои шахсии ҶТ, ки дар давраи солҳои 2005-2010 таҳти таъсири равандҳои экзогенӣ қарор доранд» дар соли 2012 аз 300 хоҷагии ба нақша гирифташуда 221 хоҷагӣ аз мавзеи хавфнок ба ҷойҳои бехавф кӯчонида шуданд», — зикр шуд имрӯз дар нишасти матбуотии Кумитаи ҳолатҳои фавқулодда ва мудофиаи граждании назди Ҳукумати ҶТ. Зикр шуд, ки наҷотдиҳандагони Кумитаи ҳолатҳои фавкулодда ва мудофиаи граждании назди Ҳукумати ҶТ дар соли 2012 342 амалиёти наҷотдиҳӣ ва кофтуковӣ гузарониданд. Ҳамчунин дар айни замон басти навбатдорони Маркази наҷотдиҳӣ ва гуруҳи наҷотдиҳандагони Ситоди ҳолатҳои фавқулодда ва мудофиаи граждании вилояти Суғд дар мавзеъҳои душворгузар ва дорои хатари тармафароии ағбаҳои Анзоб ва Шаҳристон дидбонгоҳҳо ташкил намуда, бахри кӯмак ба аҳолӣ ва пешгирии ҳолатҳои фавқулодда адои хизмат менамоянд.