Донишҷӯёни ятим аз пардохти шартнома озоданд?

Душанбе, 17 октябр. (АМИТ «Ховар», Зарангез Латифова).- -Донишҷӯёне, ки аз падару модар ятим мондаанд, аз супоридани шартнома озод мешаванд ва ба таҳсили ройгон ё буҷавӣ гузаронида мешаванд. Инчунин ба онҳо кӯмаки моддию маънавӣ низ расонида мешавад,-гуфт ректори Донишкадаи молия ва иқтисоди Тоҷикистон Раҳматулло Мирбобоев зимни нишасти матбуотӣ ба хабарнигорон. Ректор ҳамчунин дар мавриди шароити таҳсили донишҷӯён ва зимистонгузаронӣ гуфт, ки дар аудиторияҳо аз гармкунакҳои барқӣ истифода шуда, барои ҳалли ҳама гуна мушкилоти донишҷӯён тадбирҳои зарурӣ андешида мешаванд. Гуфта шуд, ки тибқи муқаррароти Ҳукумат барои донишҷӯёни фаъол идрорпулӣ дода мешавад.