Фаъолияти Иттифоқи ҷавононро мебояд ҷоннок кард

Душанбе, 30 январ. (АМИТ «Ховар», Дилшодаи Хайруллоҳ).- Мулоқоти муовини аввали раиси Кумитаи ҷавонон, варзиш ва сайёҳӣ Кабирҷон Ҷӯраев бо мудирони шуъбаҳои кор бо ҷавонони муассисаҳои олии кишвар баргузор гардидДар мулоқот Кабирҷон Ҷӯраев оид ба дастовардҳои ҷавонон ёдовар шуда, барои ҷоннок намудани фаъолияти Иттифоқи ҷавонони Тоҷикистон ба масъулин дастуру супориш дод. Мудирони шуъбаҳои кор бо ҷавонони донишгоҳҳо муваззаф гардиданд, ки дар факултаҳои муассисаҳояшон раисони Созмони ҷавононро таъйин намуда, аъзои Иттифоқро сарҷамъ намоянд, зеро Иттифоқи ҷавонони Тоҷикистон дар даврони истиқлолият ягона созмоне буд, ки ҷавононро сарҷамъ намуда, барои пойдории сулҳу ваҳдат ва ягонагии ҷавонон нақши муассир гузоштааст. Кабирҷон Ҷӯраев ҳамчунин таъкид кард, ки дар рӯзҳои наздик мулоқоти мудирони бахшҳои ҷавонон, варзиш ва сайёҳии шаҳру ноҳияҳо ва мудирони кор бо ҷавонони муассисаҳои таълимӣ бо раиси кумита Маликшо Неъматов доир мегардад, ки муҳтавояш ҷоннок намудани фаъолияти Иттифоқи ҷавонон дар қаламрави кишвар ва таҷлили Анҷумани Иттифоқи ҷавонони Тоҷикистон аст.