Фирӯз Ёқубов-соҳиби медали тилло

Душанбе, 3 январ. (АМИТ «Ховар», Музаффар Рустамов).- Рўзҳои 27-28-уми декабри соли 2012 дар шаҳри Алмаатои Ҷумҳурии Қазоқистон нахустин мусобиқаи байналмилалии гўштини тарзи озод миёни ҷавонон, барои пос доштани номи устоди варзиши Қазоқистон Кабден Байдосов баргузор гардид. Бинобар иттилои сухангӯи Кумитаи миллии олимпии ҶТ Муродалӣ Тешаев дар мусобиқаи мазкур паҳлавонони кишварҳои Қазоқистон, Қирғизистон, Ўзбекисон, Русия ва Тоҷикистон дар ҳайати 350 нафар ширкат намуданд.  Чаҳор паҳлавони тоҷик аз гўшаҳои мухолифи Тоҷикистон ба майдон баромаданд ва миёни онҳо Фирӯз Ёқубов дар вазни 85 кг барандаи медали тилло гардид. Фирўз дар даври аввал озод буда, баъдан варзишгари қирғизро мағлуб намуд ва ҳамчунин дар даври севвум варзишгари мизбонро шикаст дод. Дар даври ниҳоӣ бо варзишгари Қазоқистон бо натиҷаи баланд дастболо гардида, барандаи зинаи ифтихорӣ шуд. Бояд тазаккур дод, ки Фирўз Ёқубов ҷоизадори Чемпионати Осиё (Таиланд-2011) ва ғолиби чандкаратаи мусобиқаҳои Тоҷикистону кишварҳои ҳамсоя ба ҳисоб меравад.