Хайрхоҳӣ – хислати волои инсонӣ

Суғд, 4 январ. (АМИТ «Ховар», Самад Юсуфӣ).- Дар арафаи соли нави мелодии 2013 намояндагони раёсати Донишгоҳи давлатии ҳуқуқ, бизнес ва сиёсати Тоҷикистон ва фаъолон аз факултаи бизнес ва идораи ин даргоҳи маърифат ба осоишгоҳ – мактаб – интернати «Равшан» — и ноҳияи Бобоҷон Ғафуров омаданд. Дар ин муассисаи табобатию таълимӣ бештар аз 100 нафар кӯдаки ниёзманди табобат ва ятиму бепарастор ба таълиму тарбия фаро гирифта шудаанд.Ҳунармандони донишгоҳ барои муҳассилини ин таълимгоҳ барномаҳои рангини адабию мусиқии идона, ҳамчунин ба маблағи беш аз 700 сомонӣ туҳфаҳои солинавӣ, китобчаҳои бадеӣ ва лавозимоти хониш ҳадя карданд.