Хонаи истиқоматӣ — туҳфа ба афсарон

Душанбе, 2 январ. (АМИТ «Ховар», Бекназари Абӯбакр). — Дар арафаи Соли нави мелодии 2013 ва 20-солагии таъсиси Артиши миллӣ 44 нафар афсару прапоршики қисми низомии тобеи Вазорати мудофиаи Ҷумҳурии Тоҷикистон дар гарнизон ва комиссариатҳои ҳарбии вилояти Суғд дар шаҳри Истиқлол соҳиби манзили истиқоматӣ гардиданд. Маросими ба истифода додани бино барои хизматчиёни ҳарбӣ бо иштироки раиси вилояти Суғд Коҳир Расулзода ва вазири мудофиаи Ҷумҳурии Тоҷикистон Шералӣ Хайруллоев сурат гирифт. Шералӣ Хайруллоев хизматчиёни Қувваҳои мусаллаҳро, ки соҳиби туҳфаи арзанда шуданд, бо Соли наву хонаи нав таҳният гуфта, таъкид кард, ки ин бино бо дастури Президенти мамлакат ҷиҳати фароҳам овардани шароити хизматчиёни ҳарбӣ аз ҷониби Вазорати мудофиа таъмиру навсозӣ шудааст.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки Қоҳир Расулзода икдоми мазкурро нишонаи таваҷҷуҳу ғамхориҳои пайвастаи Сарвари давлат арзёбӣ карда, афзуд, ки сол то сол Ҳукумати мамлакат барои беҳбуди шароити хизматӣ ва баланд бардоштани малакаи касбии хизматчиёни ҳарбӣ тадбирҳои амалӣ меандешад, зеро артиш сипари боэътимоди давлат ва асоси оромиву осудагии мардум мебошад.