Ховалинг: Паррандагонро наҷот медиҳанд

Кӯлоб, 23 январ. (АМИТ «Ховар», С.Холов). – Мувофиқи омори Кумитаи ҳифзи муҳити зисти назди Ҳукумати Ҷумҳурии Тоҷикистон дар қаламрави мамлакат беш 385 намуди паррандагони нодир ва 572 намуди ҳайвоноти ваҳшӣ мавҷуданд, ки аксари онҳо дар куҳистони ноҳияи Ховалинг зиндагӣ мекунанд. Аз сабаби зимистони сарди имсола бахшҳои ҳифзи муҳити зисти ноҳияҳои куҳистон вазифадор гардиданд, ки дар таъмини ҳайвоноти ваҳшӣ ва паррандагони нодир бо дону кунҷора ва коҳу беда мусоидат намоянд. Норасоии воҳиди корӣ дар сохтори бахшҳо имкон намедиҳад, ки дар ҳама мавзеъҳои ноҳия барои паррандагону ҳайвонот дону кунҷора ва дигар намуди хӯрокӣ дастрас гардад. Аз ин рӯ роҳбарияти ноҳия кормандони бахши хоҷагии ҷангал, хоҷагиҳои деҳқонӣ ва аҳолии деҳоти куҳистон ва мактаббачагонро ба ин кор ҷалб кардаанд.