Имтиёзи судяҳо баъди истеъфо

Душанбе, 23 январ.(АМИТ «Ховар», Марзия Саидова).- Тибқи ворид намудани тағйирот ба қисми чоруми моддаи 127-и лоиҳаи Қонуни конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон», ки имрӯз палатаи поёнии парлумони мамлакат баррасӣ ва қабул намуд, судяҳо ва аҳли оилаи онҳо баъди ба истеъфо ё нафақа баромадан ҳам аз хизмати тиббӣ бархурдор мегарданд. Руҳуллоҳ Ҳакимов- муовини вазири молияи ҷумҳурӣ зимни тавзеҳи лоиҳаи қонуни мазкур дар назди вакилон гуфт, ки тибқи муқаррароти қисми чоруми моддаи 127 –и лоиҳаи қонуни мазкур судя ва аҳли оилаи ӯ ба хизмати тиббӣ ва табобатӣ -санитарӣ ҳуқуқ доранд, ки он барои судя аз ҳисоби маблағи буҷаи кишвар пардохт мешавад. Ин ҳуқуқ барои судя баъди ба истеъфо ё нафақа баромаданаш низ нигоҳ дошта мешавад. Муовини вазири молияи кишвар афзуд,ки лоиҳаи қонуни мазкур бо мақсади дар амал татбиқ намудани ислоҳоти иқтисодию молиявии кишвар, ки дар айни ҳол аз ҷониби Ҳукумати Ҷумҳурии Тоҷикистон дар ин самт тадбирҳои самарабахш андешида мешаванд, таҳия гардидааст.