Иштироки бонувон дар ҳаёти сиёсӣ

Душанбе, 4 январ.(АМИТ «Ховар», Марзия Саидова).-«Танзими ҳуқуқии фаъолияти ҳизбҳои сиёсӣ ва иштироки занон дар ҳаёти сиёсии Тоҷикистон»- чунин ном гирифтааст китоби тозанашре, ки дар нашриёти «Маориф ва фарҳанг»-и Душанбе рўи чоп омад. Дар китоб коршиносони масоили сиёсии кишвар Абдуғанӣ Мамадазимов ва Алла Қувватова дар ҳамбастагӣ бо Ассосиатсияи миллии сиёсатшиносони Тоҷикистон масоили танзими ҳуқуқии фаъолияти ҳизбҳои сиёсӣ ва иштироки занон дар ҳаёти сиёсии Тоҷикистонро таҳқиқ ва омода намудаанд, ки дар он таҳлили амиқи масъалаҳои ҷойдошта тибқи асосҳои меъёрию ҳуқуқии Ҷумҳурии Тоҷикистон гирдоварӣ шудааст. Дар китоб ҳамчунин тавсияҳо барои ислоҳоти танзими фаъолияти аҳзоби сиёсӣ пешниҳод гардидаанд, ки дар асоси таҷриба ва меъёрҳои созмонҳои байналмилалӣ, хусусан Созмони амнияту ҳамкорӣ дар Аврупо /САҲА/ асос ёфтаанд. Китоб бо забонҳои тоҷикӣ, русӣ ва англисӣ бо дастгирии дафтари ниҳодҳои демократия ва ҳуқуқи инсони САҲА нашр гардидааст. Он фарогири се қисм -танзими ҳуқуқии фаъолияти ҳизбҳои сиёсӣ дар Тоҷикистон, иштироки занон дар ҳаёти сиёсии кишвар ва тавсияҳост. 13.43.