Корхонаи коркард ва бастабандии маҳсулоти ҷангал фаъол гардид

Душанбе, 21 январ. (АМИТ «Ховар», Марҳабо Зунунова).- Дар ноҳияи Қубодиёни вилояти Хатлон дар соли 2012 корхонаи хурди истеҳсолии коркард ва бастабандии маҳсулоти ҷангал, аз қабили чормағзҳои навъи пекан, заминӣ, писта, бодом ва дигар маҳсулот ба истифода дода шуд.  Дар ин бора муовини директори Муассисаи давлатии «Хоҷагии ҷангал ва шикор» Мадиброн Саидов зимни нишасти матбуотии Кумитаи ҳифзи муҳити зисти назди Ҳукумати ҶТ хабар дод.«Дар корхона дар айни замон 7 нафар фаъолият дошта, дар таҷҳизоти махсус ба бастабандии маҳсулоти ҷангал дар халтачаҳои полиэтиленӣ машғуланд. Сипас ин маҳсулот дар бозори дохилӣ аз тариқи нуқтаҳои савдо ва дӯконҳое, ки ба муассисаи мо тааллуқ доранд, ба фурӯш бароварда мешаванд.Дар айни замон дар кишвар 9 мағоза ва 23 дӯкони савдои муассисаи мо фаъол аст. Маблағҳои аз ин ҳисоб ҷамъшударо мо барои чорабиниҳои ҳифзи муҳити зист дар хоҷагиҳои ҷангали мамлакат сарф менамоем»,-афзуд номбурда.