Манъи фурӯши маҳсулоти муҳлатгузашта

Кӯлоб, 15 январ.(АМИТ «Ховар», С. Холов). – Маркази назорати давлатии санитарию эпидемиологии ш. Кӯлоб дар давоми 12 моҳи соли 2012 дар муассисаҳои савдо, хӯроки умумӣ ва саноати хӯрокворӣ санҷиш гузаронида, маҳсулоти муҳлаташон гузаштаро ошкор сохтанд. Аз тарафи назоратчиён 57 соҳибкор барои риоя накардани ҳолатҳои эпидемиологӣ ба маблағи 10505 сомонӣ ҷарима шуда, фаъолияти 17 иншооти хӯрокворӣ муваққатан то бартараф кардани камбудиҳои ҷойдошта маҳдуд гардида, инчунин ҳуҷҷатҳои 7 нафар ба суди шаҳри Кӯлоб фиристода шуд. Аз тарафи масъулини марказ маҳсулоти хӯрокворӣ, аз қабили 32 кг маҳсулоти гӯштӣ, 64 кг обҳои нӯшиданӣ ва шарбатҳо, 24 кг маҳсулоти қаннодӣ, 45 кг маҳсулоти ширӣ, 455 кг маҳсулоти кишоварзӣ, 1 тоннаю 200 кг намаки йодноккардашуда, ки муҳлати истифодаашон гузаштааст, аз муомилот боздошта шуданд.