Маркази ташхиси замонавӣ дар Кӯлоб

Кӯлоб, 23 январ. (АМИТ «Ховар», С.Холов). – Дар шаҳри Кӯлоб маркази вилоятии ташхису табобатӣ кушода шуд, ки он бо тамоми таҷҳизоти муосири соҳавӣ ва мутахассисони соҳибтаҷрибаи соҳаи тандурустӣ таъмин гардидааст. Марказ дорои таҷҳизоти муосири томографияи компютерӣ мебошад, ки муоинаи дақиқи беморонро дар муҳлатҳои кӯтоҳтарин ба анҷом мерасонад. Ин таҷҳизоти тиббӣ нодир ва дар Ҷумҳурии Тоҷикистон ангуштшумор буда, дар шаҳри Кӯлоб дар давоми ду моҳи охир тавассути ин дастгоҳ шумораи муайяни беморон дар томографияи компютерӣ аз ташхис гузаштанд. Ба маркази ташхисии тозатаъсис на танҳо сокинони Кӯлоб, инчунин аз дигар ноҳияҳои минтақа муроҷиат мекунанд. Мавриди зикр аст, ки дар айни замон дар маркази вилоятии ташхису табобатии шаҳри Кӯлоб 17 нафар мутахассис фаъолият дорад.