Машварати корӣ дар ҳузури Оқил Оқилов

Душанбе, 25 январ. (АМИТ «Ховар»). — Имрўз дар ҳузури Сарвазири Ҷумҳурии Тоҷикистон Оқил Оқилов оид ба масоили омодагӣ ба баргузории ҷаласаи 12-уми Комиссияи байниҳукуматии Ҷумҳурии Тоҷикистон ва Федератсияи Россия оид ба ҳамкориҳои иқтисодӣ машваратӣ корӣ баргузор шуд. Тавре таъкид гардид, тибқи нақша ҷаласаи мазкур даҳаи дуюми моҳи феврали соли 2013 дар шаҳри Душанбе баргузор гардида, дар кори он ҳайати Ҳукумати Федератсияи Россия бо роҳбарии муовини аввали Раиси Ҳукумати Федератсияи Россия Игор Шувалов иштирок хоҳанд кард. Оқил Оқилов роҳбарони вазорату идораҳои дахлдори мамлакат ва дигар шахсони масъулро вазифадор кард, ки ҷиҳати таҳияи рўзномаи кории ҷаласа ва омўзишу таҳлили масъалаҳои дар он баррасишаванда тадбирҳои зарурӣ андешида, барои дар сатҳи зарурӣ баргузор намудани ҷаласаи 12-уми Комиссияи байниҳукуматии Ҷумҳурии Тоҷикистон ва Федератсияи Россия шароити созгор фароҳам оваранд.