Нафти Русия ба Тоҷикистон бе ситонидани боҷи гумрукӣ ворид мешавад

Душанбе, 17 январ. (АМИТ «Ховар», Дилшодаи Хайруллоҳ).- Дар мулоқоти Президенти Ҷумҳурии Тоҷикистон Эмомалӣ Раҳмон ва вазири корҳои хориҷии Федератсияи Русия Сергей Лавров як силсила масоили ҳамкориҳои дуҷонибаи Тоҷикистону Русия, аз ҷумла дар соҳаи сиёсату энергетика, амният, савдо ва муҳоҷирати корӣ баррасӣ гардиданд.   Сергей Лавров пас аз мулоқот бо Эмомалӣ Раҳмон дар ҳузури хабарнигорон гуфт: «Мо ҷаҳд дорем, то ҳамаи он санадҳое, ки дар сафари расмии Владимир Путин ба Душанбе ба имзо расида буданд, сари вақт ва дар муҳлати муайянгардида татбиқ шаванд». Вазири корҳои хориҷии Русия изҳори итминон намуд, ки ҳамкориҳои ду кишвар дар доираи созмонҳои мухталиф, аз ҷумла СММ, ИДМ, СПАМ ва амсоли инҳо тақвият хоҳанд ёфт. Маврид ба зикр аст, ки дар доираи созишномае, ки байни Тоҷикистону Русия ба имзо расид, бояд маҳсулоти нафтии Русия ба Тоҷикистон бидуни ситонидани боҷи гумрукӣ ворид гардад.