Нашри «Кохи нуру кохи меҳр»

Душанбе, 7 январ. (АМИТ «Ховар», Мавзуна Бойева). -Китоби рўзноманигори шинохта Самиюлло Сайфуллоев «Кохи нуру кохи меҳр бошанд з-умраш ёдгор» аз чоп баромад.Китоб ба ҳаёт ва фаъолияти собиқ раиси шаҳри Норак шодравон Яҳё Мирфозилов бахшида шудааст. Дар пешгуфтор омадааст, ки зиндагиномаи Яҳё Мирфозилов барои ҷавонон ибратомўз буда, намунаи олии садоқат ва хизмат ба Ватан мебошад. Шоир Низом Қосим менависад: «Ҳар гоҳе, ки ба Норак меравам, ё номи пуровозаю пурифтихори онро мешунавам, дар қатори мардони нурониву нурофари ин шаҳри машҳуру ин кохи беназири нур «раиси Мирфозилов» -ро ба некӣ ёд мекунам». Оид ба ҳаёт ва фаъолияти меҳнатии Яҳё Мирфозилов инчунин вакили Маҷлиси намояндагони Маҷлиси Олӣ Шакарбек Самадов, нависандагон Ҳоҷӣ Содиқ, Ҷамолиддин Тошматов, шоирон Сироҷиддин Осимӣ, Ҳоҷӣ Турсунпўлод Амини Истаравшанӣ, Б. Елманов хотираҳои неки худро гуфтаанд. Китоб барои доираи васеи хонандагон тавсия шудааст.