Парлумон ба ду қонуни конститутсионӣ тағйирот ворид мекунад

Душанбе, 21 январ.(АМИТ «Ховар», Марзия Саидова).- Лоиҳаи қонунҳои конститутсионии Ҷумҳурии Тоҷикистон «Оид ба ворид намудани тағйирот ба Қонуни конститутсионии Ҷумҳурии Тоҷикистон “Дар бораи Суди конститутсионии Ҷумҳурии Тоҷикистон» ва «Дар бораи судҳои Ҷумҳурии Тоҷикистон»-ро 21 январ аъзои Шӯрои палатаи поёнии Парлумони мамлакат дар ҷаласаи Шӯрои Маҷлиси намояндагон, ки таҳти раёсати Шукурҷон Зуҳуров-раиси палатаи поёнии Парлумони мамлакат доир гардид, баррасӣ намуданд. Аз Хадамоти матбуоти Маҷлиси намояндагон ба АМИТ «Ховар» иттилоъ доданд, ки дар ҷаласа аъзои Шӯро ҳамзамон лоиҳаи қонунҳои Ҷумҳурии Тоҷикистон «Оид ба ворид намудани тағйиру иловаҳо ба қонунҳои Ҷумҳурии Тоҷикистон «Дар бораи боҷи давлатӣ», «Дар бораи дигар пардохтҳои ҳатмӣ ба буҷа», «Дар бораи ҳуҷҷати электронӣ», «Дар бораи осорхонаҳо ва фонди осорхонаҳо», «Дар бораи омори давлатӣ», «Дар бораи маҳдуд намудани истифодаи маҳсулоти тамоку», «Дар бораи иҷозатномадиҳӣ ба баъзе намудҳои фаъолият»-ро муҳокима намуданд. Зикр гардид, ки ҳадафи пешниҳоди лоиҳаи қонунҳои мазкур ба Шӯрои палатаи поёнии Парлумони мамлакат мутобиқ намудани онҳо ба меъёрҳои қонунгузории мамлакат ба шумор меравад.