Пешгирии миқдори зиёди маводи мухаддир дар ВМКБ

Душанбе, 14 январ. (АМИТ «Ховар», Ибодат Давлатова).-Роҳандозии як амалиёти муваффақ дар Вилояти Мухтори Куҳистони Бадахшон бо мусодираи беш аз 15 кило маводи мухаддир аз муомилоти ғайриқонунӣ ба поён расид.Тавре ки ба мухбири АМИТ «Ховар» аз Раёсати Агентии назорати маводи нашъаовари назди Президенти Ҷумҳурии Тоҷикистон иттилоъ доданд, ин амалиёт аз ҷониби кормандони Раёсати Агентии назорати маводи нашъаовар дар ВМКБ анҷом дода шуд ва онҳо муваффақ шуданд, ки аз вуруди миқдори бағоят калони мухаддирот аз Афғонистон ба Тоҷикистон пешгирӣ намоянд. Ба иттилои манбаъ, кормандони фаврӣ тибқи маълумоти дастрасшуда дар қаламрави рустои Шанбедеҳи ноҳияи Ишкошим як шаҳрванди Ҷумҳурии Исломии Афғонистонро бо халтаи пур аз маводи хамирмонанди рангаш қаҳваӣ ва бастаҳои дорои моддаи бӯи махсус дошта боздошт намуданд. Озмоишгоҳи ташхиси судии Раёсати Агентӣ дар ВМКБ наздик ба 5 кило афюн ва 11 кило ҳашиш будани моддаҳои мусодирашударо таъйид намуд. Аз “меҳмони” афғонӣ, ки ғайриқонунӣ марзи давлатиро убур карда буд, дар маҷмуъ бешр аз 15 кило мухаддирот мусодира карда шуд. Аз рӯи ин ҳодиса шуъбаи тафтишотии Агентӣ парвандаи ҷиноятӣ оғоз намуд.