Санҷиши ногаҳонии вазири корҳои дохилӣ

Душанбе, 9 январ. (АМИТ «Ховар», Ибодат Давлатова).- Рӯзи 8 январи соли ҷорӣ аз ҷониби вазири корҳои дохилӣ ва муовинони ӯ санҷиши ногаҳонии қисмҳои ҳарбии Раёсати Қӯшунҳои дохилӣ сурат гирифт.Чуноне, ки ба мухбири АМИТ «Ховар» аз ВКД иттилоъ доданд, зимни санҷиш як силсила камбудиҳо вобаста ба тақсимоти амволи шайъӣ, таъминоти хӯрокӣ ва тозагии атрофи қисмҳои ҳарбӣ ошкор гардид.Худи ҳамон рӯз вобаста ба бартараф намудани камбудиҳои ошкоргардида бо роҳбарияти Раёсати Қӯшунҳои дохилӣ ва командирони қисмҳои ҳарбӣ ҷаласа доир гардид, ки зимни он диққати роҳбарияти Қӯшунҳои дохилӣ ва командирони қисмҳои ҳарбӣ ба камбудиҳои ошкоргардида ҷалб гардида, нафарони масъул барои минбаъд роҳ надодан ба камбудиҳо дар фаъолияти хизматӣ огоҳонида шуданд, хабар дод манбаъ.