Соҳибкорони беҳтарини Суғд муайян шуданд

Душанбе, 31 январ. (АМИТ «Ховар», Фарзонаи Достонзода). — Дар толори «Чойхонаи миллӣ»-и Қасри фарҳанги Арбоб мулоқоти раиси вилояти Суғд Қоҳир Расулзода бо соҳибкорони вилоят баргузор гардид.Аз хадамоти матбуоти раиси вилояти Суғд ба АМИТ «Ховар» иттилоъ доданд, ки Қоҳир Расулзода оид ба самтҳои минбаъдаи рушди соҳибкорӣ дар вилоят сухан гуфта, изҳор дошт, ки ҳоло меҳвари рушди устувори иқтисодиёт соҳибкорӣ буда, он ба ҷараёни инноватсионӣ ва пешравии илмиву техникӣ суръат бахшида истодааст.Бо мақсади ҳавасмандгардонии соҳибкорон ҷиҳати саҳмгирӣ дар рушди минбаъдаи соҳаҳои иқтисодиёт ва иҷтимоиёти вилоят ба соҳибкорони беҳтарин мукофотҳои хотиравии мақомоти иҷроияи ҳокимияти давлатии вилоят супорида шуданд.Бобо Бобохонов, муовини сардори ҶДММ КМ «Зарафшон» — и шаҳри Панҷакент «Соҳибкори беҳтарини сол дар соҳаи истеҳсолоти саноатӣ», Абдусалом Саломов, сарвари хоҷагии деқонии «Понғоз»-и ноҳияи Ашт — «Соҳибкори беҳтарин дар соҳаи истеҳсолоти агросаноатӣ», Салима Исматова, сардори корхонаи дӯзандагии «Салима»-и шаҳри Исфара- «Соҳибкори беҳтарини сол дар соҳаи пешниҳоди хизматрасонӣ», Илҳом Сангин, роҳбари ҶДММ «Равзана Пластик»-и шаҳри Хуҷанд-«Соҳибкори беҳтарини сол дар соҳаи татбиқи технологияҳои инноватсионӣ», Аҳад Раҳимов, соҳибкори инфиродӣ аз ноҳияи Б.Ғафуров -«Соҳибкори беҳтарини сол дар соҳаи содироти мол», Фаррух Шарифов, соҳибкори инфиродӣ аз ноҳияи Мастчоҳ «Соҳибкори беҳтарини сол дар соҳаи эҳсонкорӣ» эълон гардиданд.