Сохтмони гимназияи президентӣ дар Кӯлоб

Кӯлоб, 18 январ. (АМИТ «Ховар», С.Холов). – Дар сохтмони маҷмааи гимназияи президентӣ барои 640 нафар хонанда аз ҷониби фармоишгар- Дирексияи сохтмони иншооти ҳукуматии дастгоҳи иҷроияи Президенти Ҷумҳурии Тоҷикистон имрӯзҳо бо ҷалби 10 ташкилоти пудратчӣ корҳои сохтмонӣ бовусъат идома доранд. Дар бинои хобгоҳи гимназияи президентӣ дар айни ҳол аз 40 нафар мутахассиси ташкилоти сохтмонии ҶДММ «Фаридун» 15 нафар дар қисмати сохтмони болопӯши бино ба кор ҷалб гардиданд. Сохтмончиён мақсад доранд ҳарчи зудтар корҳои сохтмониро дар болопӯши бино ба анҷом расонанд. Тибқи лоиҳа маҷмааи гимназияи президентӣ барои 640 хонанда дар масоҳати 9 гектар бунёд мегардад, ки 5 гектари онро қитъаи зери сохтмон ташкил медиҳад. Тавре ки масъулини шуъбаи меъмории шаҳр иброз доштанд, барои дар муҳлати пешбинишуда ба истифода додани иншоот аз охири моҳи январ корҳои ободонӣ дар саҳни иншоот шуруъ мегарданд.