Суҳбати телефонии О. Оқилов бо И. Шувалов

Душанбе, 12 январ. (АМИТ «Ховар»). — 11-уми январи соли 2013 суҳбати телефонии Сарвазири Ҷумҳурии Тоҷикистон Оқил Оқилов бо Муовини аввали Раиси Ҳукумати Федератсияи Россия Игор Шувалов доир шуд. Зимни суҳбат ҷонибҳо масоили марбут ба кори комиссияҳои байниҳукуматии Ҷумҳурии Тоҷикистон ва Федератсияи Россия оид ба ҳамкориҳои иқтисодӣ ва масъалаи рафти таҳия ва ба тавсиб расонидани Созишнома байни Ҳукумати Ҷумҳурии Тоҷикистон ва Ҳукумати Федератсияи Россия оид ба ҳамкорӣ дар соҳаи таҳвили маҳсулоти нафтӣ ба Ҷумҳурии Тоҷикистонро мавриди баррасӣ ва муҳокима қарор доданд.Тавре таъкид шуд, лоиҳаи созишномаи мазкур бо дарназардошти таклифу пешниҳодот ва хулосаҳои ҷонибҳо омода гардида, масъалаи ба имзо расонидани он дар вақтҳои наздиктарин роҳи ҳалли худро пайдо хоҳад кард.