Таҷлили 80-солагии урологи тавонои тоҷик

Душанбе, 28 январ. (АМИТ «Ховар», Раъно Нусратуллоева).-29 январ дар «Толори тиб ва табиатшиносӣ»-и Китобхонаи миллии Тоҷикистон бо ибтикори Китобхонаи миллии Тоҷикистон, Донишгоҳи давлатии тиббии Тоҷикистон ва Ассотсиатсияи урологҳои Тоҷикистон ҷашни фархундаи 80-солагии зодрӯзи профессор Аслиддин Осимӣ таҷлил мегардад. Дар назар аст, ки ҳамоишро ректори ДДТТ ба номи Абуалӣ ибни Сино, доктори илмҳои тиб, профессор У. Қурбонов ифтитоҳ намуда, мудири кафедраи урология, доктори илми тиб Д. Солеҳов таҳти унвони «Фаъолияти илмӣ, омӯзгорӣ ва ҷамъиятии профессор А.С. Осимӣ» маърӯза намояд. Дар чорабинӣ олимони шинохтаи тибби ҷумҳурӣ, дӯстону пайвандон, шогирдони олим иштирок мекунанд. Боиси тазаккур аст, ки профессор Аслиддин Осимӣ тамоми умри бобаракати худро ба илми тибби тоҷик, минҷумла соҳаи урология бахшида, муаллифи 2 монография, 100 мақола, 62 тезис, 6 дастури таълимию методӣ, 10 пешниҳоди навоварона мебошад. Таҳти роҳбарии ў 4 нафар рисолаи номзади илмро дифоъ намудаанд. А. Осимӣ бо медали «Собиқадори меҳнат» (соли 1986), Ифтихорномаҳои Президиуми Шӯрои Олии РСС Тоҷикистон (соли 1983), «Аълочии тандурустӣ» (соли 1978), ва соли 2009 аз тарафи Президенти Ҷумҳурии Тоҷикистон Эмомалӣ Раҳмон бо медали «Шафқат» сарфароз гардидааст. Дар ин бора котиби матбуоти Китобхонаи миллии Тоҷикистон Фотима Яқубова ба хабарнигори АМИТ «Ховар» иттилоъ дод.