Таблиғи ғояи ватанпарастӣ миёни ҷавонон

Душанбе, 15 январ. (АМИТ «Ховар», Дилшодаи Хайруллоҳ).- Кумитаи ҷавонон, варзиш ва сайёҳӣ бахшида ба 20- солагии Рӯзи таъсиси Қувваҳои мусаллаҳи Ҷумҳурии Тоҷикистон ва густариш бахшидани руҳияи ватанпарастии ҷавонон дар шароити кунунии истиқлолияти милливу давлатӣ дар давоми моҳи феврали соли равон баргузории силсилаи чорабиниҳоро, аз қабили маҷлиси тантанавӣ, машғулиятҳои машваратӣ бо муовинони командирони қисмҳои низомии гарнизони Душанбе, суҳбату вохӯриҳо бо ширкати собиқадорони ҷангу меҳнат дар муассисаҳои таълимӣ ва қисмҳои низомӣ, саёҳати хонандагони макотиби таҳсилоти умумӣ ба қисмҳои ҳарбии сохторҳои низомӣ, мусобиқаҳои ҳарбиву варзиширо миёни сарбозон ба нақша гирифтааст.  Ҳадаф аз баргузории чорабиниҳо ҷоннок кардани корҳои ҳарбию ватандӯстӣ ва варзишӣ миёни сарбозони мақомоти қудратии мамлакат, вусъат бахшидани ҳисси ватанпарастии сарбозону хонандагон ва дар маҷмуъ наврасону ҷавонон маҳсуб мешавад.Дар ин бора ба мухбири АМИТ «Ховар» аз Кумитаи ҷавонон, варзиш ва сайёҳии назди Ҳукумати ҶТ иттилоъ доданд.