«Тоҷик Эйр» ба боздошти хатсайрҳо роҳ намедиҳад

Душанбе, 22 январ. (АМИТ «Ховар», Марҳабо Зунунова).- «Ширкати давлатии ҳавопаймоӣ дар ҳар як давлат фаъолият дорад ва ҳолати он симои кишварро бозгӯ мекунад. Ҳам роҳбарияти собиқ ва ҳам имрӯзаи ширкати ҳавопаймоӣ кӯшиш доранд, ки тамоми қувваи худро бар он равона созанд, то сатҳи ширкати давлатии ҳавопаймоиро баланд бардоранд, ки ин, албатта, кори осон нест», -зикр кард 21 январ директори генералии нави ширкати ҳавопаймоии «Тоҷик Эйр» Фирӯз Ҳамроев зимни нишасти матбуотӣ.Ф. Ҳамроев гуфт, ки пештар, ҳангоми ба сохторҳо ҷудо намудани ширкат, сохторҳои даромаднокро аз он ҷудо кардаанд, вале қарзҳои то ин замон ҷамъшударо миёни муассисаҳои нави соҳаи мазкур тақсим накардаанд. «Дар айни замон дар ширкати ҳавопаймоӣ аз 36 ҳавопаймои дар мувозина буда 12 адади он парвоз мекунад ва шумораи кормандон ба 720 нафар мерасад. Аз ин рӯ мо ният дорем, ки дар муддати наздик ҳайати кормандонро 30% ихтисор намоем»,- афзуд директори генералӣ ва зикр кард, ки ихтисор ба ҳайати сарнишинон ва муҳандисону техникҳо дахл надорад. Ф. Ҳамроев ҳамчунин иттилоъ дод, ки аз 12 ноябр инҷониб боздошти ягон хатсайр бинобар сабаби қарздорӣ барои хизматрасонӣ аз ташкилотҳои ҳамкор рух надодааст. Ба қавли директори генералӣ дигар ин масъаларо метавон ҳалшуда ҳисобид.