Тоҷикистон дар зинаи 8-уми Ҷоми Иттиҳод

Душанбе, 28 январ. (АМИТ «Ховар», Баҳманёр Муродов). Шоми гузашта дар маҷмааи варзишии «Петербургский»-и шаҳри Санкт-Петербурги Русия дастаи мунтахаби ҷавонони Тоҷикистон дар бозии охирини худ дар Ҷоми Иттиҳод аз дастаи Ӯзбекистон бо ҳисоби 0:2 шикаст хӯрд ва бо ин тартиб миёни 12 даста дар зинаи 8-ум мустақар гардид.   Ҳамчунин дирӯз бозии ниҳоии ин мусобиқа байни дастахои Русия ва Украина баргузор шуд, ки дар он дастаи мизбон бо ҳисоби 4:2 пирӯз гардида, бори дуввум ғолибияти ин мусобиқаро ба даст овард. Дастаи мунтахаби Украина ҷойи дуввум ва дастаҳои Беларусу Литва ҷойҳои сеюму чорумро касб карданд. Натиҷаи ба даст овардаи футболбозони ҷавони тоҷик дар Ҷоми Иттиҳод нисбат ба соли гузашта бештар назаррас аст, зеро дастаи мунтахаби кишвар соли гузашта дар мақоми 11-ум қарор гирифта буд.