Вуруд ба СУС- нақши ҳалкунанда дар сарнавишти кишвар

Душанбе, 19 январ. (АМИТ «Ховар», Дилшодаи Хайруллоҳ).- “Соли сипаригардида тибқи маълумоти оморӣ ба хориҷи кишвар сабзавот-62292 тонна, аз ҷумла пиёз-59999, полезиҳо-78, лӯбиёгӣ-2348, мевагӣ-13966, меваи хушккардашуда-76727 тонна ва дигар маҳсулот содир карда шуд”,- иттилоъ доданд ба АМИТ “Ховар” аз шуъбаи матбуот ва иттилооти Вазорати кишоварзӣ.Дар ҳамкорӣ бо шарикони рушд тавассути Шӯрои ҳамоҳангсозии рушд (ШҲР) бо қарори Ҳукумати Ҷумҳурии Тоҷикистон «Барномаи ислоҳоти кишоварзии Ҷумҳурии Тоҷикистон барои солҳои 2012-2020” қабул гардид. Ин ҳуҷҷати муҳими тақдирсоз қадамҳои навбатиро барои вазорату идораҳои соҳавӣ ва шарикони рушд дар татбиқи ислоҳот муайян намуда, дар гузариши идораи соҳаи кишоварзӣ ба талаботи иқтисоди бозаргонӣ ва рушди бахши хусусӣ мусоидат мекунад.Яке аз рӯйдодҳои муҳими соли 2012 барои соҳаи кишоварзӣ- ин воридшавии Ҷумҳурии Тоҷикистон ба Созмони Умумиҷаҳонии Савдо мебошад. Вазорати кишоварзӣ дар баробари дигар вазорату идораҳо саҳми муносиби худро ба раванди дохилшавӣ ба ин созмони бонуфузи байналмилалӣ гузоштааст.