Ҳайати Тоҷикистон оромгоҳи Мавлоноро зиёрат мекунад

Душанбе, 14 феврал. (АМИТ «Ховар», Марзия Саидова).-Ҳайати парлумонии Тоҷикистон таҳти роҳбарии Шукурҷон Зуҳуров-раиси Маҷлиси намояндагони Маҷлиси Олии ҷумҳурӣ, ки дар Покистон қарор дошт, имрӯз ба Туркия парвоз кард. Ҳайати парлумонии Тоҷикистон ҷиҳати иштирок дар конфронси якуми Ассамблеяи байнипарлумонии Созмони ҳамкории иқтисодӣ дар Исломобод қарор дошт ва бо роҳбарони парлумонҳои кишварҳои аъзои СҲИ мулоқот анҷом дод. Аз хадамоти матбуоти палатаи поёнии парлумони мамлакат ба АМИТ «Ховар» иттилоъ доданд, ки раиси Маҷлиси намояндагон Шукурҷон Зуҳуров дар Туркия бо доираҳои тиҷоратӣ ва соҳибкорони тоҷику турк мулоқот анҷом хоҳад дод. Интизор меравад, ки ҳайати парлумонии Тоҷикистон ба шаҳри Қунияи Туркия сафар карда, оромгоҳи мутафаккири бузурги тоҷик Мавлоно Ҷалолиддини Балхиро зиёрат кунад.