Ҳамла ба нуқтаи мубодилаи асъор

Душанбе, 6 феврал. (АМИТ «Ховар», Лутфия Эшонқулова).- 5 феврал сокини ноҳияи Конибодом Акмал Маннонов бо гумони сӯйиқасд ба куштор аз ҷониби кормандони ВКД дастгир шуд.Тавре ки сомонаи расмии вазорати мазкур хабар медиҳад, гумонбар бо мақсади роҳзанӣ ва куштор ба нуқтаи мубодилаи асъори «Амонатбонк», воқеъ дар кӯчаи Шарқии шаҳри Хуҷанд рафта, корманди нуқтаи мазкур Равшан Юсуфҷонов, соли таваллудаш 1972, сокини маҳаллаи 12-ро бо истифодаи корди хоҷагӣ захмдор намуда, ҷароҳати вазнини ҷисмонӣ расонидааст ва аз он ҷо 427700 суми Ҷумҳурии Ӯзбекистон, 16760 рубли Федератсияи Русия, 16221 доллари амрикоӣ ва 4608 сомонӣ маблағи пулиро тасарруф намуда, аз ҷойи ҳодиса ғайб задааст. Зимни гузаронидани чораҳои фаврию ҷустуҷӯӣ ҳамчун гумонбар дар сӯйиқасд ба куштор А .Маннонов дастгир шуда, далелҳои шайъӣ гирифта шуданд. Аз рӯи ин ҳодиса парвандаи ҷиноӣ оғоз гардида, тафтиш идома дорад.