Ҷавшанпӯш аст аз меҳру ихлоси мардум

Ҳисор, 1 феврал. (АМИТ «Ховар», Ҳотам Рабиев).- Нашриёти «Истеъдод» китоби нави Ҳакималӣ Назаралиевро бо теъдоди 500 нусха таҳти унвони «Воломақом» дастраси хонандагон намуд. Китоб ба 70- солагии зодрӯз ва фаъолияти нимасраи ҳунарии арбоби намоёни санъати тоҷик Ҷӯрабек Муродов бахшида шудааст. Асар дар асоси ёддошту ҳикояҳои дилангези мушовири калони шуъбаи фарҳанги ноҳияи Ҳисор, ҳофизи шинохта Саъдулло Пардаев, ки солҳои тӯлонӣ ҳамроҳи устоди санъат Ҷӯрабек Муродов фаъолияти эҷодӣ дошт, рӯи чоп омадааст.Саргузашт ва сӯҳбатҳои дилнишин бо бузургмардони тоҷик, ки дар асар ҳикоя андар ҳикоя омадааст, хонданбоб ва ибратбахшанд. Китоб бо аксҳои дар лаҳзаҳои гуногун аксёфта, шеърҳои аъзои «Маҳфили истеъдод», ки ба ҳофизи номдор Ҷӯрабек Муродов бахшида шудаанд, пурра гардидааст.